Подобает ведати! От вторыя седмицы Фомины начинаем чести малое повечерье и на нем канон молебный Богородицы и трипеснец Триоди Цветной. Читаем так:
в понедельник — трипеснец 1,8,9 песни
во вторник — трипеснец 2,8,9 песни
в среду — трипеснец 3,8,9 песни
в четверг — трипеснец 4,8,9 песни
в пятницу — трипеснец 5,8,9 песни
в субботу — четверопеснец 6,7,8,9 песни
на тех песнях где канон Богородицы соединяется с трипеснцем, песнь канона Богородицы не читается!
Трипеснец В понедельник Шестой седмицы по Пасхе
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.
И тропарь, глас 5, трижды:
Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.
Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (Трижды) Слава, и ныне:
О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Гла́с 5.
Пе́снь 1.
Ирмо́с: Пои́м Господеви, сотво́ршему ди́вная чудеса́ в чермне́м мо́ри, пе́снь побе́дную: я́ко просла́вися.
Припев: Слава Тебе, Боже наш, слава Тебе.
Твои́м Честны́м кресто́м Господи, дре́вния кля́твы вси́ изба́вихомся: те́мже Твою́ сла́вим Благость.
Припев: Слава Тебе, Боже наш, слава Тебе.
Распны́йся во́лею воста́, сокро́вища вся́ плени́ сме́рти, Христо́с Спас на́ш: Того́ прославля́ем.
Сла́ва: Стра́нен зра́к ви́девше блиста́ющ мироно́сицы ангела, Боже́ственное мня́ху Зижди́теля Воскресе́ние, ра́дости исполня́ющеся.
И ны́не, богоро́дичен: Восто́к Дево Пречи́стая была́ еси́ Солнца Пра́вды, и́мже неразу́мия тмы́ изба́вихомся.
Пе́снь 8.
Ирмо́с: Творца́ тва́ри, Его́же ужаса́ются ангели, по́йте лю́дие, и превозноси́те во вся́ ве́ки.
Припев: Слава Тебе, Боже наш, слава Тебе.
Бога Пло́тию распина́ема со́лнце ви́девше помрачи́ся, и земля́ поколеба́ся, и ка́мение распаде́ся.
Припев: Слава Тебе, Боже наш, слава Тебе.
Из ме́ртвых тридне́вен Христо́с воста́, и совозста́ви вся́, во тме́ и се́ни сме́ртней седя́щыя.
Припев: Слава Тебе, Боже наш, слава Тебе.
Яви́лся еси́ по воста́нии Твое́м апо́столом, и испо́лнил еси́ си́х весе́лия неизглаго́ланнаго Ще́дре.
Благословим: Отца́ Пресвята́го, Сло́ва Соприсносу́щна, и Духа Божия несозда́нна, Троицу пое́м непреста́нно.
И ны́не, богоро́дичен: Изба́ви на́с му́ки, и ве́чнаго осужде́ния, Тебе́ воспева́ющих, Богороди́тельнице Чи́стая.
Пе́снь 9.
Ирмо́с: Тя́ Блаже́нную в жена́х, и Благослове́нную Богом, челове́ческий ро́д пе́сньми велича́ем.
Припев: Слава Тебе, Боже наш, слава Тебе.
Просте́рл еси́ дла́ни на Кресте́, просте́ртаго мя́ мно́гими кова́рствы льсти́ваго, Ще́дре, приобрета́я.
Припев: Слава Тебе, Боже наш, слава Тебе.
Вся́ совоскреси́л еси́ Блаже, соше́д во а́дская врата́ Христе́, и совоздви́гл еси́ пою́щыя Человеколю́бче Твою́ Си́лу.
Сла́ва: Источи́л еси́ Христе́ ме́ртвым Живо́т, и воскре́с тридне́вен, возне́слся еси́ во сла́ве, зря́щым честны́м ученико́м.
И ны́не, богоро́дичен: Ми́лостива на́м соде́лай Пречистая Дево, Твоего́ Сына и Бога все́х, ве́рою воспева́ющым Тя́.
Вместо Достойно: поем:
А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся. Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Господи, помилуй (трижды).
Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь
И паки: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. (Трижды.)
И нам дарова́ живо́т ве́чный, / покланя́емся Его́ / тридне́вному Воскресе́нию.
Трипеснец Во Вторник Шестой седмицы по Пасхе
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.
И тропарь, глас 5, трижды:
Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.
Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (Трижды) Слава, и ныне:
О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Пе́снь 2.
Ирмо́с: Ви́дите, ви́дите, я́ко Аз е́смь Бог, в пло́ть облеки́йся во́лею Свое́ю, да спасу́ Ада́ма от ле́сти па́дшаго в преступле́ние зми́ем.
Припев: Слава Тебе, Боже наш, слава Тебе.
Якоже воздви́же дре́вле зми́а Моисе́й, та́ко на дре́во воздви́глся еси́ Ще́дре, льсти́ваго врага́ я́д змии́н и зло́бу отгоня́я, и спаса́я на́с.
Припев: Слава Тебе, Боже наш, слава Тебе.
Сла́ва Сла́ве Твое́й препросла́вленне Иисусе, положи́в бо Ся во гро́бе я́ко ме́ртв во́лею, воскре́сл еси́ я́ко Бог, и совоздви́гл еси́ ми́р Твои́м воста́нием, я́ко Всеси́лен.
Сла́ва: Се́ воста́ Животода́вец из ме́ртвых, вопия́ше жена́м дре́вле ангел блиста́яйся: не пла́читеся у́бо про́чее, но апостолом сие́ воста́ние возвести́те.
И ны́не, богоро́дичен: Святы́й Господи, от Девы Чистыя рожде́йся, распе́нся же и во́лею погребе́н, и воскресы́й из ме́ртвых, Тоя́ мольба́ми Твою́ Милость все́м низпосли́.
Пе́снь 8.
Ирмо́с: Творца́ тва́ри, Его́же ужаса́ются ангели, по́йте лю́дие, и превозноси́те во вся́ ве́ки.
Припев: Слава Тебе, Боже наш, слава Тебе.
Песносло́вим Твое́ Христе́, тридне́вное погребе́ние, и пресве́тлое Воскресе́ние, ве́рою при́сно восхваля́ем.
Припев: Слава Тебе, Боже наш, слава Тебе.
Распе́ншагося на́с ра́ди, и положи́вшагося во гро́бе, и Свои́м воста́нием просвети́вшаго ми́р, Христа́ славосло́вим.
Благословим: Со́лнце незаходи́мое Христе́, погребы́йся и воскресы́й из ме́ртвых, просвети́ все́х на́с помышле́ния, сла́вити Тя́ непреста́нно.
И ны́не, богоро́дичен: Мольбу́ из тебе́ воплоти́вшемуся Сло́ву, сотвори́ Богородице Дево, я́ко да на́с уще́дрит смире́нных.
Пе́снь 9.
Ирмо́с: Велича́ем Христе́, Твою́ Всенепоро́чную Матерь Чистую, я́ко роди́ Тя преесте́ственно пло́тию, от вся́кия льсти́ и тли́ на́с избавля́яй.
Припев: Слава Тебе, Боже наш, слава Тебе.
Яко а́гнец на заколе́ние приведе́ся Владыко Христе́ Боже, и я́звами Твои́ми, я́же во́лею претерпе́л еси́, бесо́в вся́кое лука́вое мно́жество уязви́л еси́.
Припев: Слава Тебе, Боже наш, слава Тебе.
Сокруши́шася вереи́ а́довы прише́ствием Твои́м Христе́, и воста́ша от ве́ка истле́вшии, воспева́юще Тя́ я́ко победи́теля, и все́ми владу́щаго.
Сла́ва: Свято́е Твое́ Христе́, е́же из гро́ба воста́ние, Живо́т е́сть, вознесе́ние же при́сно и весе́лие, е́же ве́рою вси́ мы́ ны́не предпра́зднуем.
И ны́не, богоро́дичен: Све́т на́м и́же от Све́та Дево Пречи́стая ро́ждши, разори́ла еси́ безбо́жия тму́: те́мже вси́ земноро́днии ве́рою Тя́ велича́ем.
Вместо Достойно: поем:
А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся. Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Господи, помилуй (трижды).
Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь
И паки: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. (Трижды.)
И нам дарова́ живо́т ве́чный, / покланя́емся Его́ / тридне́вному Воскресе́нию.
Трипеснец В Пятницу Шестой седмицы по Пасхе
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.
Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (Трижды) Слава, и ныне:
О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
глас 1.
Пе́снь 5.
Ирмо́с: Нечести́вии не у́зрят сла́вы Твоея́ Христе́, но мы́ Тя Единоро́дне, Отеческия сла́вы сия́ние Божества́, от но́щи у́тренююще воспева́ем Тя́, Человеколю́бче.
Припев:Слава Тебе, Боже наш, слава Тебе.
Восходя́ от земли́ к Небеси́, не отлуче́н бы́л еси́ Отца́, и соседя́ Владыко и Духу, Его́же ученико́м посла́л еси́ с Небесе́ Уте́шителя.
Припев:Слава Тебе, Боже наш, слава Тебе.
Безпло́тных чи́ни, я́ко ви́деша Тебе́ Иисусе с Пло́тию на Небеса́ возше́дша, ра́дующеся дивля́хуся мно́гому Твоему́ Господи, к челове́ком снизхожде́нию.
Сла́ва: Истле́вшее Владыко существо́ на́ше, на престо́ле Отечесте посади́л и удобри́л еси́ Господи, с Ни́мже и́маши приити́ суди́ти ми́ру Всеси́льне.
И ны́не, богоро́дичен: Чи́стую и Пречи́стую почти́м мы́сленно, добро́ту Иа́ковлю, и Боже́ственными де́тельми удобря́ему благоче́стно пои́м, я́ко Ма́терь Бога на́шего.
Пе́снь 8.
Ирмо́с: Изба́вителю все́х Всеси́льне, посреде́ пла́мене благоче́ствовавшыя снизше́д ороси́л еси́, и научи́л еси́ пе́ти: вся́ дела́ благослови́те, по́йте Господа.
Припев:Слава Тебе, Боже наш, слава Тебе.
На херуви́мску ра́му носи́мь, возне́слся еси́ во сла́ве, зря́щым Тя́ ученико́м Твои́м Господи, и вопию́щым непреста́нно: вся́ дела́ Господня Господа по́йте, и превозноси́те Его́ во ве́ки.
Припев:Слава Тебе, Боже наш, слава Тебе.
Низложи́в вражду́ средосте́ния, уме́ршыя Отцу́ Твоему́ примири́л еси́, и возше́д соприве́л еси́, ю́же прия́л еси́ Пло́ть Безнача́льне Сло́ве превы́ше Нача́л и Си́л.
Благословим: Благословля́я ученики́ возноша́лся еси́ на высоту́ Христе́, Уте́шителя си́м посла́в, пою́щым и единому́дренно вопию́щым: вся́ дела́ Господня Господа по́йте, и превозноси́те Его́ во ве́ки.
И ны́не, богоро́дичен: Общее ве́рных очисти́лище, гото́вую челове́ком по́мощь, и к зижди́телю мо́ст, преводя́щий все́х ко спасе́нию, Божию Матерь сла́вим.
Пе́снь 9.
Ирмо́с: Ева у́бо неду́гом преслуша́ния кля́тву всели́ла е́сть, Ты́ же Дево Богородице, прозябе́нием чревоноше́ния, ми́рови благослове́ние процвела́ еси́: те́м Тя́ вси́ велича́ем.
Припев:Слава Тебе, Боже наш, слава Тебе.
От горы́ Христе́ Елео́нския, о́блак Тебе́ я́коже престо́л прия́т, все́м боже́ственным Твои́м ученико́м зря́щым, и с тре́петом вопию́щым Ти́: не оста́ви си́ры, и́хже возлюби́л еси́ за милосе́рдие несказа́нное.
Припев:Слава Тебе, Боже наш, слава Тебе.
Соше́л еси́ пе́рвее без пло́ти, возше́л же еси́ Пло́ть нося́, ю́же прия́л еси́: стра́хом же врата́ небесная Тебе́ отверзо́шася, и у́ми небеснии зря́ще дивля́хуся, глаго́люще: сла́ва е́же на́с ра́ди Твоему́ Владыко соше́ствию.
Сла́ва: Что́ стоите́ вы́, зря́ще возше́ствие стра́шное; дре́вле реко́ша ангели боже́ственным апостолом: и́мже о́бразом ви́дите восходя́ща, па́ки на зе́млю прии́дет суди́ти все́х, со сла́вою неизрече́нною.
И ны́не, богоро́дичен: Сопрису́тствующи боже́ственным ученико́м Пречистая, и зря́щи, Его́же родила́ еси́, от земли́ возноси́ма, вопия́ла еси́: восхо́диши к Безнача́льному Отцу́, сла́вою Твое́ю исполня́яй вся́ческая, препросла́вленный Еди́не Господи.
Вместо Достойно: поем: задостойник
Припев: Велича́й, душе́ моя́,/ возне́сшагося от земли́ на Не́бо Христа́ Жизнода́вца.
Глас 4: Ра́дуйся, Цари́це,/ матероде́вственная Сла́во:/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно;/ изумева́ет же ум всяк Твое́ Рождество́ разуме́ти.// Те́мже Тя согла́сно сла́вим.
Сла́ва, и ны́не: Го́споди, поми́луй, трижды.
Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь
Четверопеснец В Субботу Шестой седмицы по Пасхе
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.
Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (Трижды) Слава, и ныне:
О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
глас 8.
Пе́снь 6.
Ирмо́с: Моли́тву пролию́ ко Господу, и тому́ возвещу́ печа́ли моя́, я́ко зо́л душа́ моя́ испо́лнися, и живо́т мо́й а́ду прибли́жися, и молю́ся я́ко Ио́на: от тли́ Боже возведи́ мя.
Припев: Слава Тебе, Боже наш, слава Тебе.
Испо́лнив я́же на земли́ Сла́вы Твоея́, возне́слся еси́ со сла́вою несказа́нною, и Отцу́ прине́сл еси́ Пло́ть, в ню́же от на́с за милосе́рдие обле́клся еси́: и воспе́ша небе́сныя си́лы Тебе́, Еди́не Человеколю́бче.
Припев: Слава Тебе, Боже наш, слава Тебе.
Возми́теся небесная врата́, и приими́те Бога, плотоно́сца, мы́сленныя вопия́ху си́лы повину́ющымся: кто́ Се́й, Его́же глаго́лете, и хвалу́ я́ко Творцу́ вся́ческих непреста́нно прино́сите;
Сла́ва: Восхо́д стра́шный зря́ще Сло́ва ученицы́, вопия́ху: посли́ на́м Пресвята́го Духа, и си́ры не оста́ви рабы́ Твоя́, ве́дящыя Тя́ Истиннаго Бога, и Челове́ка безгре́шна.
И ны́не, богоро́дичен: Обожи́л еси́ челове́ческое естество́, неизрече́нно роди́вся от Девы, Отца́ Единосу́щное Сло́во, и возне́слся еси́ со сла́вою: да́руй ми́р Твои́м ученико́м, и ми́рови бога́тую милость.
Пе́снь 7.
Ирмо́с: Отроцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́ Господи Боже во ве́ки.
Припев: Слава Тебе, Боже наш, слава Тебе.
Стра́сть и сме́рть претерпе́л, и тридне́вен воста́л еси́, я́коже ре́кл еси́, и к небесным возше́л еси́, пою́щым Тя́ ученико́м, Господи Боже во ве́ки.
Припев: Слава Тебе, Боже наш, слава Тебе.
Духа на́м, я́коже обеща́л еси́, Пресвята́го посли́ Ще́дре, му́дрии ученицы́ вопия́ху, умудря́юща и вразумля́юща вся́ ве́рныя во ве́ки.
Сла́ва: Рука́ми восплещи́те язы́цы, воскли́кните Богу в весе́лии: вознесе́ся Христо́с, и седи́т во сла́ве одесну́ю, я́ко Сопресто́лен Отцу́, во ве́ки.
И ны́не, богоро́дичен: Не́дра Отча не истощи́в, в не́дрех Твои́х Сло́во восклони́ся, безслове́сия на́с избавля́я, Дево, пою́щих Господа Бога во ве́ки.
Пе́снь 8.
Ирмо́с: Седмери́цею пе́щь, халде́йский мучи́тель, богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.
Припев: Слава Тебе, Боже наш, слава Тебе.
Вообра́жся, я́коже пи́шет, па́че ума́ в чу́ждее, и страстьми́ все́м ве́рным безстра́стие я́ве да́руя, от земли́ восхо́дит, ны́не яви́тися Отеческому лицу́: ангелом, архангелом, престо́лом и господьством, того́ славосло́вящым во вся́ ве́ки.
Припев: Слава Тебе, Боже наш, слава Тебе.
Белоно́сцы ангели апостолом предста́ша, недоумышля́ющымся но́вому виде́нию Твоего вознесе́ния, Сло́ве Отцу́ Безнача́льне, глаго́люще: вы́ что́ взира́ете, та́ко чудя́щеся, на высоту́; Иисус Се́й па́ки прии́дет суди́ти ми́ру, и́мже о́бразом ви́дите.
Благословим: Вся́ соверши́вый Господи, я́ко Бог непрело́жен, к небесным с Пло́тию восте́кл еси́, повину́ющымся Тебе́ ангельским си́лам, и ра́достно ученико́м Тебе́ сла́вящым, и со стра́хом пою́щым: свяще́нницы воспо́йте, лю́дие превозноси́те во вся́ ве́ки.
И ны́не, богоро́дичен: Богороди́тельнице Пречистая, души́ моея́ я́звы, и греха́ моего стру́пы очи́сти, исто́чники излива́ющи из ре́бр Рождества́ Твоего, и и́же из Него очища́ющи струя́ми: к Тебе́ бо взыва́ю, и к Тебе́ припа́даю, и Тебе́ призыва́ю еди́ну спаси́тельницу.
Пе́снь 9.
Ирмо́с: Устраши́ся вся́к слу́х, неизрече́нна Божия снизхожде́ния, я́ко вы́шний во́лею сни́де да́же и до Пло́ти, от Деви́ческаго Чре́ва бы́в челове́к: те́мже Пречистую Богородицу ве́рнии велича́ем.
Припев: Слава Тебе, Боже наш, слава Тебе.
Возми́те врата́ мы́сленныя, небесныя си́лы, прии́де Царь на́ш, ме́ртвенное существо́ прии́м, и вни́дет Бог Сы́й и Челове́к ко Отцу́ Своему́, соде́лав стра́шная и пресла́вная.
Припев: Слава Тебе, Боже наш, слава Тебе.
По́йте вси́ разу́мно, воскли́кните Богу, сотвори́вшему дела́ пресла́вная, и возше́дшему к небесным, и апостолом Свята́го Духа низпосла́вшему, просвеща́ющему на́с сла́вящих Божество́ Его.
Сла́ва: Разруши́ся а́д погребе́нием, и воста́ние челове́ком дарова́ся воскресе́нием Твои́м, и озари́ся земля́, и небесная вознесе́нием Твои́м Христе́, Еди́не Непреме́нне и Всеси́льне, Да́телю Благи́х, и Спаси́телю на́ш.
И ны́не, богоро́дичен: Гла́с Ти́ Гаврии́лов со все́ми ангелы прино́сим: ра́дуйся пала́то Царя́ возжеле́нная: ра́дуйся земна́я с небесными Дево совокупи́вшая, ея́же ра́ди спаса́емся, ве́дуще Тя́ Чи́стую Богома́терь.
Вместо Достойно: поем: задостойник
Припев: Велича́й, душе́ моя́,/ возне́сшагося от земли́ на Не́бо Христа́ Жизнода́вца.
Глас 4: Ра́дуйся, Цари́це,/ матероде́вственная Сла́во:/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно;/ изумева́ет же ум всяк Твое́ Рождество́ разуме́ти.// Те́мже Тя согла́сно сла́вим.
Сла́ва, и ны́не: Го́споди, поми́луй, трижды.
Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь